maqbara ban jaa.e ḳhud me.amar ka
kya bharosa ret ki divar ka
kis taraf uTThe qadam kis ko gharaz
shahr men charcha raha raftar ka
gham-zada to mutma.in sa tha magar
kis ne samjha gham kisi gham-ḳhvar ka
main huun aur har zarra-e-sahra ka gham
tu hai aur matam dar-o-divar ka
rabta rakhiye har ik fankar se
sher kahiye apne hi me.aar ka
is samundar men ghire hain ham jahan
kashtiyon par bojh hai patvar ka
lahr jab uThe sadaf sahil pe laa.e
koi mauqa bhi to ho iz.har ka
ḳhama-e-be-roshna.i bhi huun main
muntazir bhi huun kisi shahkar ka
mehr-e-alam-tab sar par aa gaya
bujh gaya saaya har ik divar ka
koi chehra ho ki ho koi kitab
sab pe hai jaadu samundar-par ka
Leave a Reply