Hirs-O-Hawas Ke Aage Na Kuchh Bhi Dikhai De

hirs-o-havas ke aage na kuchh bhī dikhā.ī de

insān apne qad se bhī chhoTā dikhā.ī de

apne diloñ kā khoT nazar aatā nahīñ hai

sikka parāyā ho to vo khoTā dikhā.ī de

koī to aisā shaḳhs mujhe DhūñD ke lā do

insāniyat kā bojh jo Dhotā dikhā.ī de

kyā nāzukī hai aaj dil-e-fitna-sāz kī

ḳhud ko lage jo Thes to rotā dikhā.ī de

gar lahroñ ke mizāj ko samjhe na nāḳhudā

sāhil pe hī safīna Dubotā dikhā.ī de

zauq-e-junūñ meñ ḳhud ko farāmosh kar diyā

‘shahnāz’ ko ārām na hotā dikhā.ī de

Leave a Comment