Shahnaz Muzammil
hirs-o-havas ke aage na kuchh bhi dikha.i de
insan apne qad se bhi chhoTa dikha.i de
apne dilon ka khoT nazar aata nahin hai
sikka paraya ho to vo khoTa dikha.i de
koi to aisa shaḳhs mujhe DhunD ke la do
insaniyat ka bojh jo Dhota dikha.i de
kya nazuki hai aaj dil-e-fitna-saz ki
ḳhud ko lage jo Thes to rota dikha.i de
gar lahron ke mizaj ko samjhe na naḳhuda
sahil pe hi safina Dubota dikha.i de
zauq-e-junun men ḳhud ko faramosh kar diya
‘shahnaz’ ko aram na hota dikha.i de
Leave a Reply