poet

Gasht Na Kar Idhar-Udhar Be-Khabari Jahan Mein Hai

gasht na kar idhar-udhar be-khabari jahan men hai

apne hi dil men ghaur kar dekh makin makan men hai

raat tamam kho chuka niind se sair ho chuka

jaag ki khuub so chuka kus-e-ajal fughan men hai

kis se misal tujh ko duun ghair kahan jo naam luun

haal kahun to kya kahun qufl-e-adab zaban men hai

paanv bahut thaka chuka shaam ka qurb aa chuka

daud ki vaqt ja chuka tu pas-e-karvan men hai

dekh kahin dagha na ho jism se jaan juda na ho

jald sambhal khata na ho tir-e-ajal kaman men hai

manzil-e-gor tang hai pa-e-faragh lang hai

tujh ko abhi umang hai aur hi kuchh guman men hai

tujh ko ‘nasim’ kya hua did-e-jahan se dil utha

rang-e-fareb ja-ba-ja har gul-e-bostan men hai

More Poems

Leave a Comment