ulte vo shikve karte hain aur kis ada ke saath
be-taqati ke taane hain uzr-e-jafa ke saath
bahr-ayadat aae vo lekin qaza ke saath
dam hi nikal gaya mira avaz-e-pa ke saath
be-parda ghair paas use baitha na dekhte
uth jaate kaash ham bhi jahan se haya ke saath
vo lala-ru gaya na ho gulgasht-e-bagh ko
kuchh rang bu-e-gul ke evaz hai saba ke saath
us ki gali kahan ye to kuchh bagh-e-khuld hai
kis jaae mujh ko chhod gai maut la ke saath
aati hai bu-e-dagh-e-shab-e-tar hijr men
siina bhi chaak ho na gaya ho qaba ke saath
gulbang kis ka mashvara-e-qatl ho gaya
kuchh aaj bu-e-khun hai vahan ki hava ke saath
the vaade se phir aane ke khush ye khabar na thi
hai apni zindagani usi bevafa ke saath
kuche se apne ghair ka munh hai mita sake
ashiq ka sar laga hai tire naqsh-e-pa ke saath
allah re gumrahi but o but-khana chhod kar
‘momin’ chala hai kaabe ko ik parsa ke saath
Leave a Reply