is tarah rasm mohabbat ki ada hoti hai
aaj se teri miri raah juda hoti hai
main kisi aur hi duniya men pahunch jaata huun
jab bhi kanon men azanon ki sada hoti hai
bad-dua koi agar de to bura mat maano
bad-dua bhi to miri jaan dua hoti hai
niind ke saath hi ik baab naya khulta hai
ḳhvab ke TuTne juḌne ki katha hoti hai
jism ki vadiyon men rah ke ye jaana main ne
jism ki pyaas to ghanghor ghaTa hoti hai
main tujhe chhoḌ ke hargiz nahin jaane vaala
ai miri jaan tu be-vaj.h ḳhafa hoti hai
do javan dil jo mohabbat men kabhi paḌ jaa.en
kya ye sach-much men ḳhuda ki hi ḳhata hoti hai
Leave a Reply