Ek Duje Ko Aaina Dikhaen Chalo Aao

ik duuje ko ā.īna dikhā.eñ chalo aao

ye āḳhirī taklīf uThā.eñ chalo aao

yuuñ hai ki munāfe.a kā to imkāñ hī nahīñ hai

nuqsān kā andāza lagā.eñ chalo aao

muddat se khañDar dil kā bhī vīrān paḌā hai

kuchh der yahīñ ḳhaak uḌā.eñ chalo aao

haiñ jaal to yāroñ ne bichhā.e bhī par ab ke

dushman kī chalī chaal meñ aa.eñ chalo aao

us tak hai safar laakh sarāboñ se muzayyan

‘shākir’ na kahīñ ḳhud se bhī jaa.eñ chalo aao

Leave a Comment