dekha tha kis nazar se tum ne hansi hansi men
ik dard-e-mustaqil hai ab meri zindagi men
ka.aba bhi but-kada bhi hai rah-e-bandagi men
ye manzilen hain kaisi dushvar ashiqi men
ai dost yaad un ki ab tak rula rahi hai
do din jo mil ga.e the hansne ko zindagi men
ik baat par hamari uljhan men paḌ ga.e tum
duniya na jaane kya kya karti hai dosti men
jab hosh men raha main chhupte rahe vo mujh se
parde haTa diye sab dekha jo be-ḳhudi men
ai meri sham-e-furqat yuun dil nahin bahalta
kuchh aur raushni kar taron ki raushni men
manzil pe mujh ko la kar daman jhaTak rahe ho
yaad aa.ega mujhe ye ehsan zindagi men
daur-e-ḳhizan se ab to bahla raha huun dil ko
kanTon men phans gaya huun phulon ki dosti men
tu un ke samne ho vo tere samne hon
aisa bhi ek sajda ‘arif’ ho be-ḳhudi men
Leave a Reply