sab dekhne vaale unhen ghash khaa.e hue hain
is par bhi ta.ajjub hai vo sharma.e hue hain
ai jan-e-jahan ham ko zamane se gharaz kya
jab kho ke zamane ko tujhe paa.e hue hain
hairan huun kyuun mujh ko dikha.i nahin dete
sunta huun miri bazm men vo aa.e hue hain
nisbat ki ye nisbat hai sharaf ka ye sharaf hai
tire hain agar ham tire Thukra.e hue hain
hai dekhne valon ko sambhalne ka ishara
thoḌi si naqab aaj vo sarka.e hue hain
Leave a Reply