Hasan Naim
ankhon se Tapke os to jaan men nami rahe
mahke umiid dard ki kheti hari rahe
ye kya ki aaj vasl to kal sadma-e-firaq
tab hai maza ki bazm-e-nigaran jami rahe
kab puchhta hai koi lagavaT se dil ka haal
yaron ka hai mizaj ki kuchh dil-lagi rahe
afat ke pahaḌ ka din-rat samna
kis ki panah mange kahan aadmi rahe
jis ne bhi jaana ishq ko tafrih ḳhush raha
sanjida ho ke ham to nihayat dukhi rahe
ji chahta hai phir usi mah-vash se rabt ho
ḳhalvat-kade men ruuh ke phir chandni rahe
dil kya bujha ki nuur nahin char-su ‘na.im’
jalta rahe dimagh to kuchh raushni rahe
Leave a Reply