is apni kiran ko aati hui sub.hon ke havale karna hai
kanTon se ulajh kar jiina hai phulon se lipaT kar marna hai
shayad vo zamana lauT aa.e shayad vo palaT kar dekh bhi len
in ujḌi ujḌi nazron men phir koi fasana bharna hai
ye soz-e-darun ye ashk-e-ravan ye kavish-e-hasti kya kahiye
marte hain ki kuchh din ji len ham jiite hain ki aḳhir marna hai
ik shahr-e-vafa ke band dariche ankhen miche sochte hain
kab qafila-ha-e-ḳhanda-e-gul ko in rahon se guzarna hai
is niili dhund men kitne bujhte zamane raakh bikher ga.e
ik pal ki palak par duniya hai kya jiina hai kya marna hai
raston pe andhere phail ga.e ik manzil-e-gham tak shaam hui
ai ham-safaro kya faisla hai ab chalna hai ki Thaharna hai
har haal men ik shoridgi-e-afsun-e-tamanna baaqi hai
ḳhvabon ke bhanvar men bah kar bhi ḳhvabon ke ghaaT utarna hai
Leave a Reply