sahar anjan si maghmum sa ḳhvab-e-vafa kyuun hai
na jaane qurbaton ke naam se ye fasla kyuun hai
andhere zahr barsane lage hain zindagani par
kisi ke pyaar ka mahtab aise men ḳhafa kyuun hai
zara jab raat Dhalti hai to ḳhvabon ke jharoke se
hasin manus shaklon ka savera jhankta kyuun hai
bahar aa.i faza mahki ḳhushi ne haath phaila.e
to phir ye zindagi avara-e-dasht-e-vafa kyuun hai
shab-e-gham kaT ga.i lekin ujalon se gale mil kar
sahar ki aarzu itni sahar na-ashna kyuun hai
mire anfas se aati hai ḳhushbu-e-sahar kaisi
sukut-e-bam-o-dar men aaj teri hi sada kyuun hai
koi dil se nahin guzra to ‘saqib’ kaun batla.e
kisi pazeb ki jhankar se dil gunjta kyuun hai
Leave a Reply