ankhon men hai par aankh ne dekha nahin abhi
vo but jise ki main ne tarasha nahin abhi
lafzon ke pattharon men sanam be-shumar hain
mere hi paas soch ka tesha nahin abhi
sadiyon se naqsh hai jo tasavvur pe shahkar
kaghaz pe us ka aks utara nahin abhi
barson se mere sar pe hai TukḌa ik abr ka
jal-bujh chuka hai jism vo barsa nahin abhi
jiine se bhar chuka hai dil-e-zar kya karun
marne ki arzu-o-tamanna nahin abhi
manind-e-mulk-e-rome luTi ghar ki saltanat
yaron ye saneha mujhe bhula nahin abhi
‘shahid’ nigar ḳhana-e-sad-rang hai jahan
phir bhi vo naqsh aankh se utra nahin abhi
Leave a Reply