Nawaz Asimi
tha ajab seminar ka mausam tabsire ho rahe the har fan par
sha.eri par sabhi ka qaul tha ye gard kitni jami hai darpan par
aaj qiston men dhuup utri hai par baḌe karr-o-farr se utri hai
aaj suraj hai Dubne ko magar dhuup ke naqsh-e-pa hain angan par
aaj badal phaTe hain ankhon men aaj sailab aane vaala hai
aaj chehre ke koh TuTenge aur chaTanen girengi daman par
kashmakash men hain tinke chhappar ke ḳhaak ho jaa.en ya ThiThurte rahen
barq hi barq hai fazaon men os hi os hai nasheman par
aap muslim hain aap ke sar par mufti sahab ka qaul utrega
kufr aur shirk aur bid.at ke fatve aate nahin barahman par
ḳhaal jis ne ‘navaz’ udheḌi hai vo hi darzi hai mere paikar ka
vo hi gin kar bata.ega tum ko kitne paivand hain mire tan par
Leave a Reply