hamare jaise hi logon se shahr bhar ga.e hain
vo log jin ki zarurat thi saare mar ga.e hain
gharon se vo bhi sada de to kaun niklega
hai din ka vaqt abhi log kaam par ga.e hain
ki aa ga.e hain tiri shor-o-shar ki mahfil men
ham apni apni ḳhamoshi se kitna Dar ga.e hain
unhin se siikh len tahzib raah chalne ki
jo raah dene ki ḳhatir hamin Thahar ga.e hain
sabhi ko karte hain mil-jul ke rahne ki talqin
kuchh apne aap men ham is qadar bikhar ga.e hain
nahin qubul hamen kamyabi ka ye junun
ye jante bhi hain nakamiyon pe sar ga.e hain
to kyuun satati hai bigḌe dinon ki yaad ki ham
musalahat hui duniya se ab sudhar ga.e hain
hava-e-dasht yahan kyuun hai itna sannaTa
vo tere saare divane bata kidhar ga.e hain
Leave a Reply