Altaf Hussain Hali
dil se ḳhayal-e-dost bhulaya na ja.ega
siine men daagh hai ki miTaya na ja.ega
tum ko hazar sharm sahi mujh ko laakh zabt
ulfat vo raaz hai ki chhupaya na ja.ega
ai dil raza-e-ghair hai shart-e-raza-e-dost
zinhar bar-e-ishq uThaya na ja.ega
dekhi hain aisi un ki bahut mehrbaniyan
ab ham se munh men maut ke jaaya na ja.ega
mai tund o zarf-e-hausla-e-ahl-e-bazm tang
saaqi se jaam bhar ke pilaya na ja.ega
raazi hain ham ki dost se ho dushmani magar
dushman ko ham se dost banaya na ja.ega
kyuun chheḌte ho zikr na milne ka raat ke
puchhenge ham sabab to bataya na ja.ega
bigḌen na baat baat pe kyuun jante hain vo
ham vo nahin ki ham ko manaya na ja.ega
milna hai aap se to nahin hasr ghair par
kis kis se iḳhtilat baḌhaya na ja.ega
maqsud apna kuchh na khula lekin is qadar
ya.ani vo DhunDte hain jo paaya na ja.ega
jhagḌon men ahl-e-din ke na ‘hali’ paḌen bas aap
qissa huzur se ye chukaya na ja.ega
Leave a Reply