Shahzad Anjum Burhani
mar jaane ki us dil men tamanna bhi nahin hai
andar se koi kahta hai jiina bhi nahin hai
gul ho ga.iin sham.en zara tum jaao havao
shaḳhon pe koi TuTne vaala bhi nahin hai
ai sang sar-e-rah malamat se guzar ja
tera bhi nahin hai koi mera bhi nahin hai
ahbab ki chahat pe shub.h bhi nahin hota
ham jaisa magar koi akela bhi nahin hai
tu chhoḌ gaya hai to koi gham na karenge
is daur men insan ḳhuda ka bhi nahin hai
ye kya ki ḳhayalon se uḌi jaati hai ḳhushbu
main ne to abhi tak use socha bhi nahin hai
Leave a Reply