zehn-o-dil men pichhli shab ki dastan to saaf ho
jhilmilaenge sitare asman to saaf ho
ghair ko to chhod us ka jo bhi ho radd-e-amal
baat lekin tere mere darmiyan to saaf ho
rah-ravi jaari rahe be-shak ho manzil ke khilaf
karvan par hukm mir-e-karvan to saaf ho
dil samajh lega ishara aap kar ke dekhiye
shart hai lekin nigahon ki zaban to saaf ho
kis tarah aae nazar ‘bebak’ ab zakhm-e-jigar
rauzan-e-dil va ho chashm-e-khun-chakan to saaf ho
Leave a Reply