ye shab o roz jo ik be-kali rakkhi hui hai
jaane kis husn ki divangi rakkhi hui hai
vo jo ik mauj-e-mohabbat tire ruḳh par jhalki
aankh men aaj bhi us ki nami rakkhi hui hai
vaqt deta hai jo pahchan to ye dekhta hai
kis ne kis dard men dil ki ḳhushi rakkhi hui hai
aati rahti hain ajab aks o sada ki lahren
mere hisse ki kahin sha.iri rakkhi hui hai
dasht ki chup se ubharti hain sada.en kya kya
bahr ke shor men kya ḳhamushi rakkhi hui hai
koi dhun hai pas-e-iz.har safar men jis ne
meri ghazlon ki faza aur si rakkhi hui hai
kam kaha aur sujhaya hai zyada ‘ali’
ek ik satr men ik an-kahi rakkhi hui hai
Leave a Reply