jab vo apne gharon se nikle
un ke saron pe kafan bandha tha
dilon men josh
ankhon men be-khaufi
qabile ki buzurg-tarin hasti ne pukarna chaha
apni talvaren lete jaao
lekin un ke patthar hone ka dar tha
jab vo apni bastiyon se nikle
un ke sinon men dabi hui aahen thiin
honton pe larzishen
haath duaon ke liye daraz
us ne pukarna chaha
apne razm-name lete jaao
lekin khamosh rahi
jab vo sarhadon pe pahunche
un ki ankhon men tasviren thiin
dilon men hasraten
qadmon men laghzishen
us ne bahut chaha ki unhen na pukare
apni loriyan lete jaao
sabhon ne mud kar us ki taraf dekha
aur kaha
ham patthar nahin hain
Leave a Reply