zindagi se mili saughat ye tanha.i ki
ḳhvab TuuTe hain ka.i aankh men sahra.i ki
kyuun sar-e-bazm miri us ne pazira.i ki
us men sazish to nahin phir se mire bhaa.i ki
barq manzar se nigahon ki basarat chhine
fikr dushman ko mire hai miri bina.i ki
log chehre pe udasi ka sabab puchhenge
kya kahunga ki mujhe fikr hai rusva.i ki
log bahar se samajhte hain bahut ḳhush huun main
kya ḳhabar un ko mire zaḳhm ki gahra.i ki
main bhi a.unga tujhe dene mubarakbadi
jab bhi avaz sununga tiri shahna.i ki
chhin kar munh se gharibon ke nivale ‘shamsi’
hakim-e-vaqt ne kya ḳhuub masiha.i ki
Leave a Reply