Nooh Narvi
kya kahun ham-nashin ye mera bhaag
ek jaan aur saikḌon hain khaḌag
phir kabhi mai se tauba kar lunga
ab to botal ka khul gaya hai kaag
dida-o-dil ki nibh nahin sakti
is men paani hai aur us men aag
kar ke vo zikr jaur Dha.enge
taar bola ki ham ne bujha raag
ab ḳhizan men kahan vo rang-e-chaman
jald-tar luT gaya dulhan ka suhag
muflisi men hai dil amiron ka
ham langoTi men khelte hain phaag
dil hamara buton ko bhuul gaya
ab na kashi nazar men hai na praag
chor se kah rahe hain chori kar
aur vo kah rahe hain shaah se jaag
sho.ala-ru main ne kyuun kaha un ko
aur bhi ho ga.e vo sun kar aag
bazm-e-aish-o-nashat ho ga.i ḳhatm
ab kahan ragni kahan vo raag
kyuun sambhalta nahin mizaj apna
hai dava-o-maraz men shayad laag
sab tire dost sab mire dushman
ik mira baḳht ek tera bhaag
koi lahze ko bhi nahin rukta
tausan-e-umr ki hai Dhili baag
qaul de kar tira mukar jaana
mujh se itna lagav itni laag
hai jidhar meri manzil-e-maqsud
main udhar ja raha huun bhaga bhaag
main ne dekha ye bazm-e-alam men
apni Dafli hai aur apna raag
mausam-e-gul abhi nahin aaya
chal diye ghar men ham laga kar aag
roz malte hain munh par apne bhabhut
ishq men ham ne le liya bairag
dil laga kar mujhe hua ma.alum
ishq men hain baḌe baḌe se khaḌag
in ko tufan-e-ḳhalq se kya Dar
hazrat-e-‘nuh’ hain purane ghaag
Leave a Reply