hava mahak uthi rang-e-chaman badalne laga
vo mere samne jab pairahan badalne laga
baham hue hain to ab guftugu nahin hoti
bayan-e-hal men tarz-e-sukhan badalne laga
andhere men bhi mujhe jagmaga gaya hai koi
bas ik nigah se rang-e-badan badalne laga
zara si der ko barish ruki thi shakhon par
mizaj-e-sosan-o-sarv-o-saman badalne laga
faraz-e-koh pe bijli kuchh is tarah chamki
libas-e-vadi-o-dasht-o-daman badalne laga