Thik Hai in Dinon KHud Par Zara Ghussa Hun Main

Osama Khalid

Thiik hai in dinon ḳhud par zara ghussa huun main

phir bhi apni sabhi harkat ko takta huun main

aankh ki mez pe rakkha hai mira ḳhvab-e-safar

aur bistar pe shikan Daal ke soya huun main

maslahat DhunDte phirte ho sabhi kamon men

tum ko bimar nahin lagta to achchha huun main

vaqt-e-vahshat mujhe pahchan nahin paata koi

phir batata huun fulan shaḳhs ka beTa huun main

tum jo chaho to mujhe peḌ ka hissa kar do

varna pairon tale raunda hua patta huun main

chand lamhon ka dhuan aks men tabdil hua

aur main jhuum ke kahne laga dekha huun main

saḳht bimari men rakhta huun ḳhayal aap apna

ḳhud se ḳhud puchhta rahta huun ki kaisa huun main