ye niili aanch ya nilam-pari hai
hava ki taan par jo jhumti hai
mira kamra misal-e-dasht-e-vahshat
jahan ram-ḳhurda hirni kho ga.i hai
uḌa phirta hai panchhi canvas par
musavvir ki ajab surat-gari hai
talab men qatra-e-naisan ki be-dam
sar-e-sahil koi siipi paḌi hai
vahan tha aaj gul khulne ka imkan
jahan kal raat hi bijli giri hai
jahan par dhuup din likh kar ga.i thi
vahan ab raat ne kalak mali hai
guzara is pe bhi kar to rahe hain
magar tu hi bata ye zindagi hai
hai is men tul-e-sham-e-gham ka qissa
jo ye balisht bhar ki Diary hai
mayassar hai suḳhan-danon ki sohbat
tabhi achchhi ghazal-kari hui hai
Leave a Reply