Raat Baghiche Pe Thi Aur Raushni Patthar Mein Thi

raat bāġhīche pe thī aur raushnī patthar meñ thī

ik sahīfe kī tilāvat zehn-e-paiġhambar meñ thī

aadmī kī band muTThī meñ sitāra thā koī

ek jādūī kahānī sub.h ke mantar meñ thī

ek raḳhsh-e-sañg thā ātish-kade ke sāmne

ek niilī mom-battī dast-e-āhan-gar meñ thī

biich meñ soī huī thī ātish-e-ā.indagāñ

ek pairāhan kī ThanDak dhuup kī chādar meñ thī

paañv sākit ho ga.e ‘sarvat’ kisī ko dekh kar

ik kashish mahtāb jaisī chehra-e-dilbar meñ thī

Leave a Comment