shahr ke haspatal men us ko
ek hafta hua hai aae hue
”sat number” ka kaana thekedar
kanpta tha jo dekh kar nashtar
us ke zakhmon pe aaj kal vo khud
apne hathon se phaae rakhti hai
langda budh-sen ”gyarah number” ka
us ki ankhon men daal kar ankhen
ghunt kadvi dava ke piita hai
”panch number” ka diq-zada shaer
dekh kar us ko sher kahta hai
ward ke kitne hi marizon se
us ne vaada kiya hai shadi ka
ward ke kitne hi marizon ko
tandurusti bahal hone par
us ke ham-rah ghar basana hai!
Leave a Reply