dard-e-musafir thahar gaya tha akhiyon ki hairani men
sirf mohabbat bahti thi aur saath ye ashk ravani men
kaise hua aur kab ye hua kuchh khabar nahin thi dil ko to
ek mohabbat ja soi thi vahshat men virani men
dard ki shiddat aur badhi thi shahr-e-vafa ki shamon men
aur virani baith gai thi un akhiyon ke paani men
is hasti ke andhiyaron ne bakht ko aise ghera tha
apni sada tak ujad gai thi dil ki nauha-khvani men
ek sukhnavar ke lafzon ne mujh ko yuun barbad kiya
lutf samaat ko milta hai ab to zahr-afshani men
us ne anjani si baten kiin to phir ye ilm hua
ham to daana samajh rahe the khud ko badi nadani men