Poet
dard-e-dil mo’atabar bhi hota hai
shaḳhsiyat ka asar bhi hota hai
kis nagar men qayam karta main
kahin majnun ka ghar bhi hota hai
shahr men aa ke ye hua malum
aadmi janvar bhi hota hai
ek be-ḳhauf justuju ke saath
ek anjan Dar bhi hota hai
shikva-e-dahr kya ki dukh aksar
apne ehsas par bhi hota hai
kucha-gardo tumhen pata hai kya
ek zehni safar bhi hota hai
jo bahar-o-ḳhizan ke gham sah jaa.e
vahi pauda shajar bhi hota hai
fan se iz.har-e-fan hai mushkil-tar
dard-e-dil dard-e-sar bhi hota hai
Leave a Reply