Yun to Nahin Ki Pahle Sahaare Banae The

yuun to nahin ki pahle sahare bana.e the

dariya bana ke us ne kinare bana.e the

kuuze banane vaale ko ujlat ajiib thi

puure nahin bana.e the saare bana.e the

ab ishrat-o-nashat ka saman huun to huun

ham ne to diip ḳhauf ke maare bana.e the

di hai usi ne pyaas bujhane ko aag bhi

paani se jis ne jism hamare bana.e the

phir yuun hua ki us ki zaban kaaT di ga.i

vo jis ne guftugu ke ishare bana.e the

sahra pe badalon ka hunar khul nahin saka

qatre bana.e the ki sharare bana.e the

‘shahid’ ḳhafa tha katib-e-taqdir is liye

ham ne zamin pe apne sitare bana.e the