ruḳh se burqa jo ulaT de vo to aafat ho jaa.e
qad-kashi ho to numudar qayamat ho jaa.e
daulat-e-husn-e-butan se to na rahiye mahrum
badshahi na ho par ishq ki daulat ho jaa.e
haal dekhe tire hairan ka jo ai a.ina-ru
hai yaqin dida-e-tasvir ko riqqat ho jaa.e
naam ghar jaane ka le yaar agar tu shab-e-vasl
ḳhana-e-tan se yahan jaan bhi ruḳhsat ho jaa.e
ta.ir-e-bagh asiran-e-bala nahaq hain
abhi uḌ jaa.en tasavvur men jo himmat ho jaa.e
intizar-e-but-e-be-pir se kya is ka ajab
mar ga.e par bhi jo va dida-e-hasrat ho jaa.e
doston ka ye hua haal ki kahti hai ḳhalq
dushmanon ko bhi tire saath na ulfat ho jaa.e
ik nazar dekhe tira husn jo ai a.ina-ru
abhi tasvir ka va dida-e-hairat ho jaa.e
tab.a-e-ali yahi kahti hai qalam se har dam
sher vo likh tu ki afaq men shohrat ho jaa.e
Leave a Reply