Wo Nairang-E-Ulfat Ko Kya Jaanta Hai

vo nairang-e-ulfat ko kya janta hai

ki apne se mujh ko juda janta hai

kuchh aisi to dushman men khubi nahin hai

magar tu khuda jaane kya janta hai

ye munh se to kahta huun chhodi mohabbat

magar haal dil ka khuda janta hai

tumhari shararat ko kya jaane koi

ye main janun ya dil mira janta hai

‘zahir’ apne aibon ko main janta huun

zamana mujhe parsa janta hai

Leave a Comment