Marhala Shauq Ka Hai Lafz-O-Bayan Se Aage

marhala shauq ka hai lafz-o-bayan se aage

ek shoala hai koi barq-e-tapan se aage

apni hairat ka to hai ilm yaqin se pahle

tu bata mujh ko hai kya mere guman se aage

haan mira shauq-laqa teri inayat hi sahi

kya mila mujh ko magar ijz-e-bayan se aage

kyuun bana Daala ise meri nigahon ka ghurur

tera jalva hai agar husn-e-butan se aage

apni khalvat se kabhi tu bhi na bahar jhanka

mujh ko jaane na diya mere makan se aage

kuchh nahin is ke siva apni nigahon ki bisat

kuchh dikhai na diya sud-o-ziyan se aage

fahm-o-idrak pe bhi mere hai pahra tera

aur tu saare makan saare zaman se aage

imtihan khatm nahin hota isi par ‘tarzi’

ju-e-khun laani hai ik ashk-e-ravan se aage

Leave a Comment