Ehsan Jafri
apnon ne ujaḌa hai chaman jaan ga.e hain
pardon men chhupa kaun hai pahchan ga.e hain
tapti hui saḌkon pe safar ham ne kiya hai
ab barf jo dekhi hai to ausan ga.e hain
vishvas kei girti hui divar ke saa.e
qadmon se kuchalte hue iman ga.e hain
maana ki diya us ne hamen rutba-e-ali
jannat se nikale bhi to insan ga.e hain
ghar apna samajh kar jo rahe farsh-e-zamin par
rote hue duniya se vo mehman ga.e hain
jo phuul kei ḳhushbu ko chhupane men lage the
nakam mohabbat men vo insan ga.e hain
un se to na thi koi hamen bughz-o-adavat
be-kar si baton ko bura maan ga.e hain
Leave a Reply