raat ka har ik manzar ranjishon se bojhal tha
chand bhi adhura tha main bhi na-mukammal tha
aankh ki munDeron par aarzu nahin larzi
ik charagh ki lau se ik charagh ojhal tha
ja mila tire dar ke gum-shuda zamanon men
meri umr ka hasil pyaar ka jo ik pal tha
kyuun sulagti avazen bhiig bhiig jaati thiin
dasht-e-na-rasa.i men dhuup thi na badal tha
duur to na tha itna ḳhema us ke ḳhvabon ka
raste men apni hi ḳhvahishon ka jangal tha
Leave a Reply