Wasi Shah
us ke hathon se jo ḳhushbu-e-hina aati hai
aisa lagta hai ki jannat se hava aati hai
chumne daar ko kis dhaj se chala hai koi
aaj kis naaz se maqtal men qaza aati hai
na kabhi koi kare tujh se tire jaisa suluk
haath uThte hi yahi lab pe dua aati hai
tere gham ko ye barahna nahin rahne deti
meri ankhon pe jo ashkon ki rida aati hai
us ke chehre ki tamazat bhi hai shamil is men
aaj tapti hui savan ki ghaTa aati hai
ghumne jab bhi tire shahr men jaati hai vafa
bain karti hui vapas vo sada aati hai
hai vahi baat har ik lab pe bahut aam yahan
ham se jo kahte hue un ko haya aati hai
Leave a Reply