Shaheen Abbas
ḳhvab khulna hai jo ankhon pe vo kab khulta hai
phir bhi kahiye ki bas ab khulta hai ab khulta hai
bab-e-ruḳhsat se guzarta huun so hoti hai shanaḳht
jis qadar dosh pe saman hai sab khulta hai
ye andhera hai aur aise hi nahin khulta ye
der tak raushni ki jaati hai tab khulta hai
meri avaz pe khulta tha jo dar pahle-pahal
main pareshan huun ki ḳhamoshi pe ab khulta hai
ik makan ki baḌi tashvish hai rahgiron ko
vo jo barson men nahin khulta to kab khulta hai
ab khula hai ki charaghon ko yahan rakkha jaa.e
ye vo ruḳh hai jahan darvaza-e-shab khulta hai
us ne khulne ki yahi shart rakhi ho jaise
mujh men girhen si laga jaata hai jab khulta hai
Leave a Reply