Poet
vo uTThe hain tevar badalte hue
chalo dekhen talvar chalte hue
na dekha tire daur men ai falak
nihal-e-tamanna ko phalte hue
hain angusht-hairat-ba-dandan masih
vo murde jilate hain chalte hue
chalo mai-kada mahfil-e-va.az se
ye ammame dekho uchhalte hue
zaban par tira naam jab aa gaya
to girte ko dekha sambhalte hue
mohabbat men paa.e har ik raah se
hazaron hi raste nikalte hue
hain kya un ki zulfen ye ai dil na puchh
chhalave ko dekha hai chhalte hue
bane juzv-e-tan jab chubhe ḳhar-e-gham
ye kanTe na dekhe nikalte hue
kiya kuchh na jab tak raha iḳhtiyar
jahan se chale haath malte hue
gham-e-ishq paida hua mere saath
use guzri ik umr palte hue
ruke kis tarah tegh-e-abru ka vaar
suna hai ajal ko bhi Talte hue
in a.ankhon ke fitnon ka kya puchhna
ye jaadu hain lakhon men chalte hue
nahin sham.a-e-ariz pe ḳhat jama.a hain
hazaron hi parvane jalte hue
fasane hain mash.hur ushshaq ke
kaTi umr furqat men jalte hue
javan marte dekhe bahut na-murad
suna hoga arman nikalte hue
nahin khel chalna rah-e-ishq men
zara paanv rakhna sambhalte hue
jo mash.hur sabit qadam the ‘habib’
unhen ham ne dekha phisalte hue
Leave a Reply