ḳhvabon ki vadiyon men dilon ko phira.e hai
dariya men jab bhi lahr koi sar uTha.e hai
nas nas men rach gaya hai takallum ka bankpan
ankhon ki ḳhamushi bhi mujhe gudguda.e hai
rishton ki dhuup shaam hui aur Dhal ga.i
ab us se kya gila vo agar bhuul jaa.e hai
darvaze khul ga.e hain bahut tez hai hava
tinka samajh ke koi mujhe bhi uḌaa.e hai
lamhe laraz rahe hain faza.en udaas hain
sham.a-e-tasavvurat ki lau tharthara.e hai
mere nuqush-e-pa mujhe lauTa de rahguzar
ik karvan-e-gham mire pichhe bhi aa.e hai
hai tez dhuup saya-e-qurbat talash kar
aise men ghumne koi bahar bhi jaa.e hai
‘parvaz’ zindagi ko abas chheḌte hain aap
bechari jaane kitnon ke naḳhre uTha.e hai
Leave a Reply