Raqib-E-Jaan Nazar Ka Nur Ho Jae To Kya Kije

Ameeta Parsuram Meeta

raqib-e-jan nazar ka nuur ho jaae to kya kiije

ziyan dil ko agar manzur ho jaae to kya kiije

vafa karne se vo majbur ho jaae to kya kiije

mohabbat ruuh ka nasur ho jaae to kya kiije

vahi charche vahi qisse mili rusvaiyan ham ko

unhi qisson se vo mashhur ho jaae to kya kiije

zamane se gila kaisa jab apne jism ka saaya

andhere men hamin se duur ho jaae to kya kiije

khuda ko itna chahun to khuda ho jaega raazi

magar vo aur bhi maghrur ho jaae to kya kiije

munavvar jis ke dam se thiin hamari zindagi ‘mita’

vahi mahtab gar mastur ho jaae to kya kiije