jo log ujale ko ujala nahin kahte
ham un ko bura kahte hain achchha nahin kahte
jo joḌ na de TuuTe hue taar dilon ke
ham us ko mohabbat ka tarana nahin kahte
jiina ise kahte hain jo ho auron ki ḳhatir
apne liye jiine ko to jiina nahin kahte
insan ke dil-o-zehn munavvar na hon jis se
ham aise ujale ko ujala nahin kahte
hairat men kabhi jalve ko ham kahte hain parda
parde ko kabhi shauq men parva nahin kahte
tum samne ho aur tumhen dekh na paa.en
ham aise nazare ko nazara nahin kahte
ham tum sa hasin kaise kahen shams-o-qamar ko
har husn ko to husn-e-sarapa nahin kahte
dil rakhne ko munh se yunhi kah dete hain achchha
dil se to ‘jigar’ vo hamen achchha nahin kahte
Leave a Reply