mere khush rahne se us ko kuchh pareshani na thi
us ko zinda dekh kar mujh ko bhi hairani na thi
do thake-hare dilon ne ik nadi par raat ki
thi magar jazbon men vo pahli si tughyani na thi
ruk gaya tha vo mire hujre men jaane kis liye
asman shaffaf tha aur raat tufani na thi
tegh-zan ko vaar se pahchan leta tha hadaf
lafz ki ijad se pahle rajaz-khvani na thi
rafta rafta qahqahon ke rang phike pad gae
hont the sarsabz lekin vo hansi dhani na thi
ek se divar-o-dar ko dekhna tha umr bhar
apni ankhon ke muqaddar men jahanbani na thi
vaqt mahnga ho raha tha lafz bhi kamyab the
shairon ko khvab bunne men bhi asani na thi
Leave a Reply