tu apni zaat ke zindan se gar riha.i de
to mujh ko phir mire ham-zad kuchh dikha.i de
bas ek ghar ho ḳhuda.i men ka.enat miri
mire ḳhuda mujhe itni baḌi ḳhuda.i de
main us ko bhulna chahun to guunj ki surat
vo mujh ko ruuh ki patal men dikha.i de
bujha chuka hai zamana charagh sab lekin
ye mera ishq ki har rasta dikha.i de
hamare shahr ke saudagaron ki mahfil men
vo ek shaḳhs ki sab se alag dikha.i de
use ghurur ata hai koi to ab aa.e
jo us ke dast men bhi kasa-e-gada.i de
palaT bhi sakti huun ‘iman’ fana ki rahon se
agar koi mujhe us naam ki daha.i de
Leave a Reply