Na Koi Mamnua Dana Khana Na KHauf Dil Mein Utarna Tha

Sarfraz Arish

na koi mamnua daana khana na ḳhauf dil men utarna tha

jo ham ne pahla gunah kiya tha kisi ki naqlen utarna tha

jadid duniya men aane valon ki pahli muDbheḌ ham se hoti

hamare unit ka kaam un ke badan se mohren utarna tha

ḳhuda na hota to karvan-e-jahan men apni jagah na banti

ki in dinon men hamara pesha safar men nazren utarna tha

ham aise lafzon ke karigar the ki manDiyon men hamara Theka

shu.ur-e-kuza-gari ki ḳhatir varaq pe shaklen utarna tha

hamare logon ne bahami mashvare se mil kar bujha diye the

vo diip jin ke hasab nasab men zamin pe sub.hen utarna tha

hamari ghaḌiyon pe shaam hone men panch bajne men din paḌe the

so ham ko chhuTTi se pahle ḳhud ko kisi lahad men utarna tha

kisi ke lahje ki chaaT aisi lagi ki apna shi.ar ‘arish’

mukalme ke junun men ḳhud par udaas nazmen utarna tha