Riyaz Latif
hisar ke sabhi nizam gard gard ho ga.e
ham apne apne jism men ḳhala-navard ho ga.e
ravaniyan sifar huiin masafaten khanDar huiin
najat ke tamam shahkar sard ho ga.e
hava-e-jan ka kya miyan uTha ga.i uḌa ga.i
jame na the badan men ham ki phir se gard ho ga.e
ibaraton men aa basi ajiib rut sukut ki
qalam ki shaḳh ke tamam barg zard ho ga.e
na puchh ham se kya hua hayat ka ‘riyaz’ ka
davam chhu gaya unhen to kard kard ho ga.e
Leave a Reply