Saud Usmani
kuchh aur akele hue ham ghar se nikal kar
ye lahr kahan jaa.e samundar se nikal kar
malum tha milna tira mumkin nahin lekin
chaha tha tujhe main ne muqaddar se nikal kar
aalam men ka.i aur bhi aalam the so main ne
dekha nahin is markaz o mahvar se nikal kar
ab dekhiye kis shaḳhs ka ham-dosh bane vo
jhonke ki tarah mere barabar se nikal kar
ḳhvahish hai ki ḳhud ko bhi kabhi duur se dekhun
manzar ka nazara karun manzar se nikal kar
takta raha main us ki mubaraz-e-talbi ko
vo mujh se laḌa tha mire lashkar se nikal kar
Leave a Reply