Razi Akhtar Shauq
salamat aa.e hain phir us ke kucha-o-dar se
na koi sang hi aaya na phuul hi barse
main agahi ke ajab mansabon pe faa.ez huun
ki aap apna hi munkir huun apne andar se
na jaane kis ko ye e.azaz-e-fan mila hoga
tamam shahr men bikhre hue hain patthar se
ab is ke mauj-o-talatum men Dubne se na Dar
guhar bhi tujh ko mile the usi samundar se
ye ehtimam-e-charaghan bhi kis kamal ka hai
diye jale hain to main bujh gaya huun andar se
ajab saman tha ki ab tak hain zaḳhm zaḳhm ankhen
main kor-chashm bhala agahi ke manzar se
Leave a Reply