ilahi khair ho vo aaj kyuun kar tan ke baithe hain
kisi ke qatl karne ko bhabhuka ban ke baithe hain
subuk-sar hai vahi jo dusron ke ghar pe jaata hai
jo apne ghar men baithe hain vo lakhon man ke baithe hain
ghazab hai qahr hai shamat hai aafat hai qayamat hai
baghal men vo adu ke aaj kyuun ban-than ke baithe hain
kahen kya mudda.a apna sunaen raz-e-dil kyuun kar
hamare samne kuchh aadmi dushman ke baithe hain
maza kunj-e-lahad men kyuun na luun main saghar-e-mul ka
ki bada-khvar paas aa kar mire madfan ke baithe hain
khuda ke vaste un ko nikal kar jalva dikhla do
ki khvahish-mand kuche men tire chitvan ke baithe hain
hain pyase ham to muddat ke pila de jam-e-mai saaqi
vo jab chahen piyen jo muntazir savan ke baithe hain
tabiat ho to aisi ho jo aadat ho to aisi ho
abhi vo tan ke baithe the abhi vo man ke baithe hain
agar raghbat na ho is dahr men muuzi ko muuzi se
to kyuun khar-e-mughilan paanv men rahzan ke baithe hain
nahin maalum kis ko tadte hain kis se vaada hai
ba-vaqt-e-sham paas aa kar jo vo chilman ke baithe hain
nahin parva agar ai ‘mashriqi’ un ko bala jaane
agar vo hain khinche baithe to ham bhi tan ke baithe hain