simTe to aise shams-o-qamar men simaT ga.e
bikhre to aise ḳhaak ke zarron men baT ga.e
manzil kahan safar hi safar ho ga.i hayat
itna chale ki paanv se raste lipaT ga.e
ye vaqt ka karam hai ki rukte nahin hain din
kaTna na chahiye tha jinhen vo bhi kaT ga.e
ab dekhna hai kaun sanvarega tere phuul
ik ham hi teri raah ka kanTa the hiT ga.e
qad-avari pe ham ko bahut naaz tha magar
jab zindagi ki aag se guzre to ghaT ga.e
Leave a Reply