pukare ja rahe ho ajnabi se chahte kya ho
ḳhud apne shor men gum aadmi se chahte kya ho
ye ankhon men jo kuchh hairat hai kya vo bhi tumhen de den
bana kar but hamen ab ḳhamushi se chahte kya ho
na itminan se baiTho na gahri niind so paao
miyan is muḳhtasar si zindagi se chahte kya ho
use Thahra sako itni bhi to vus.at nahin ghar men
ye sab kuchh jaan kar avargi se chahte kya ho
kinaron par tumhare vaste moti baha laa.e
gharaunde bhi nahin toḌe nadi se chahte kya ho
charagh-e-sham-e-tanha.i bhi raushan rakh nahin paa.e
ab aur aage hava ki dosti se chahte kya ho
Leave a Reply