Sohail Akhtar
zaruri kab hai ki har kaam iḳhtiyari karen
ab apne-ap ko itna na ḳhud pe taari karen
ye injimad bhi TuTega dekhna ik din
ham e’timad se pahle to ḳhud ko jaari karen
koi bhi khel ho hairan ab nahin karta
na jaane kaun se kartab na.e madari karen
bulava arsh se aata hai gar to aata rahe
jo ḳhak-zade hi Thahre to ḳhaksari karen
hai tishnagi se taḳhayyul men taqat-e-parvaz
huzur mujh ko na sairabiyon se bhari karen
kasif ham hain sarasar magar latif hai vo
to us ke vaste kya ḳhud ko ḳhud se aari karen
lagam khinch ke baiThe hain be-niyaz se ham
samand-e-shauq ki ab chahe jo savari karen
ata kiya gaya sahra is ek shart ke saath
‘suhail’ ham na kabhi vahshaton se yaari karen
Leave a Reply